«ՉԲԱՑԱՀԱՅՏՎԱԾԻ ԴԱՐՊԱՍԸ» խորագիրը կրող արդեն ավանդական դարձած գիտաժողովին մասնակցեցին աշխարհի 20 երկրների ավելի քան 200 երիտասարդ բժիշկներ և գիտնականներ։ Շատերի համար այն դարձավ առաջին հնարավորությունը միջազգային մակարդակով ներկայացնելու սեփական հետազոտությունները, քննարկելու դրանց արդյունքները և գուցե գտնելու համագործակցության եզրեր այլ երկրներից ժամանած իրենց գործընկերների հետ։

Ուզում ենք հիշեցնել, որ այս գիտաժողովը իր բնույթով Հայաստանում միակն է և անց է կացվում յուրաքանչյուր երկու տարին մեկ։ Գիտաժողովի ընթացքում երիտասարդ մասնագետները հնարավորություն են ստանում նաև ունկնդրելու բարձր վարկանիշ ունեցող մի շարք անվանի մասնագետների դասախոսությունները։ Հավելենք, որ արտերկրից առավել ակտիվ մասնակցություն ապահովելու նպատակով գիտաժողովի կազմակերպիչները արտերկրի մասնակիցներին տրամադրել էին ճանապարհորդային և կեցության դրամաշնորհներ։

Սեպտեմբերի 20-ին Գիտությունների ազգային ակադեմիայի նիստերի դահլիճում տեղի ունեցավ գիտաժողովի հանդիսավոր բացումը, որին անմիջապես հաջորդեց Հայկական բժշկական ասոցիացիայի պատվավոր անդամների կոչումների շնորհումը։ Հայկական բժշկական ասոցիացիայի կանոնադրությամբ այս կոչմանն արժանանում է տարեկան մեկ անձ։ Ընդ որում, մեկ տարի կոչումը տրվում է Հայաստանը, իսկ հաջորդ տարի` արտերկիրը ներկայացնող գիտնականի։ Մինչ այժմ այս կոչմանը արժանացել էին ակադեմիկոս Էմիլ Գաբրիելյանը և պրոֆեսոր Հակոբ Ակիսկալը։ Այս տարի ասոցիացիայի գործադիր վարչության որոշմամբ պատվավոր անդամի կոչումները շնորհվեցին ՀՀ ԱՆ Առողջապահության ազգային ինստիտուտի հիմնադիր և երկարամյա ղեկավար, ակադեմիկոս Սուրեն Ավդալբեկյանին և ՌԴ Բակուլևի անվան սրտանոթային վիրաբուժության գիտական կենտրոնի պրոֆեսոր, Ռուսաստանի բժշկական գիտությունների ակադեմիայի ակադեմիկոս Բագրատ Ալեքյանին։

Նույն օրը գիտաժողովի մասնակիցները այցելեցին Ծիծեռնակաբերդի հուշահամալիր, եղան ցեղասպանության թանգարանում, ծաղիկներ դրեցին հուշակոթողին։ Աշխարհի տարբեր երկրներից ժամանած երիտասարդ բժիշկներին նաև ընձեռվեց հիմնականում տարբեր երկների ղեկավարներին ու պետական պատվիրակություններին տրվող բացառիկ հնարավորթյուն. այն է` տնկել հիշատակի եղևնի համանուն ծառուղում։

Սեպտեմբերի 21-23-ին գիտաժողովն իր բուն աշխատանքները շարունակեց Երևանի «Կոնգրես» հյուրանոցում, ուր միաժամանակ մի քանի սրահներում անց էին կացվում մասնագիտական սեկցիաների աշխատանքները, որոնք ուղեկցվում էին բուռն քննարկումներով։ Նույն այդ օրերին հայ և արտասահմանցի բազմաթիվ երիտասարդ մասնագետներ հնարավորություն ստացան ունկնդրելու Քնի բժշկության համաշխարհային ասոցիացիայի նախագահ, պրոֆեսոր Սութհանսու Չոկրովերտիի, Գրոնինգենի (Նիդերլանդներ) համալսարանի պրոֆեսոր, նյարդաբան-հոգեբույժ Ջեյկոբ Կորֆի, Մոսկվայի Վիշնևսկու անվան անոթային վիրաբուժության ինստիտուտը ներկայացնող Ալեքսանդր Խազարովի և Հալեպի (Սիրիա) համալսարանի պրոֆեսոր, ուռուցքաբան-էնդոկրինոլոգ Ջանի Հադդադի բովանդակալից դասախոսությունները, որոնց ժամանակ վերջիններս ներկայցրեցին իրենց ոլորտի վերջին նվաճումները։

Գիտաժողովի ընթացքում բոլոր մասնակիցները միաժամանակ գնահատում էին իրենց գիտական սեկցիայում ներկայացված յուրաքանչյուր աշխատանք։ Այսպիսով կազմակերպիչները փորձել էին ապահովել առավելագույն անաչառություն` հաշվի առնելով այն փաստը, որ լավագույն աշխատանքների հեղինակների համար նախատեսված էին հատուկ մրցանակներ։

Սեպտեմբերի 23-ին տեղի ունեցավ գիտաժողովի աշխատանքների ամփոփումը և փակման հանդիսավոր արարողությունը, որի ընթացքում հայտնի դարձան հաղթողների անունները։ Մասնավորապես` ԵՊԲՀ-ի ընդհանուր և օրգանական քիմիայի ամբիոնի ասպիրանտ Արտակ Թովմասյանը և ԵՊԲՀ-ի ֆարմակոգնոզիայի և բուսաբանության ամբիոնի ավագ լաբորանտ Արաքսյա Թոփչյանը Հայկական բժշկական ասոցիացիայի կողմից միանվագ կրթաթոշակ ստացան` իրենց ընտրությամբ, եվրոպական որևէ գիտաժողովի մասնակցելու համար։ Բացի այդ Էդմոն Քյոսայանի անվան մրցանակը բաժանվեց երկու մասի և հանձնվեց համապատասխանաբար Բակուլևի անվան սրտանոթային վիրաբուժության գիտական կենտրոնի կլինիկական օրդինատոր Սերգեյ Բարսամյանին և Առողջապահության ազգային ինստիտուտի ինտերվենցիոն սրտաբանության ամբիոնի ավագ լաբորանտ Տիգրան Հակոբյանին։ Իսկ գլխավոր` գիտաժողովի նախագահական մրցանակին արժանացավ Երևանի պետական բժշկական համալսարանի նյարդաբանության ամբիոնի ասպիրանտ, Հայաստանի երիտասարդ նյարդաբանների լիգայի նախագահ Սամսոն Խաչատրյանը, որը, բացի համապատասխան կրթաթոշակից, արժանացավ նաև երիտասարդ բժիշկների հաջորդ` թվով հինգերորդ միջազգային գիտաժողովը նախագահելու պատվին։ Հավելենք, որ գիտաժողովի համակազմակերպիչները դիպլոմներով պարգևատրեցին ևս 19 մասնակիցների։

Այս գիտաժողովի կազմկոմիտեի անդամներից շատերը մի քանի տարի առաջ իրենք էին տակավին առաջին քայլերն անում բժշկագիտության ոլորտում։ Հաճելի է, որ այդ երիտասարդների համար վստահություն և փորձ ձեռք բերելու գործում ավանդ ունեցան նաև երիտասարդ բժիշկների գիտաժողովները։ Այսօր արդեն հենց նրանք են օգնում ու աջակցում ավելի երիտասարդ սերնդին միջազգային չափանիշներին համապատասխանող գիտական նյութեր պատրաստելուն ու ներկայացնելուն։

Այս գիտաժողովների առանձնահատկություններից է նաև նրանց ուսուցողական բնույթը։ Հազվադեպ է պատահում, որ երիտասարդ մասնագետին ինչ-որ բան է հաջողվում անել առաջին փորձից, առավել հազվադեպ են նման հաջողությունները գիտության ասպարեզում։

Հաշվի առնելով այն, որ գիտաժողովն արդեն ունի բավականին լուրջ ճանաչում` կազմակերպիչները առավելագույնս փորձել էին է’լ ավելի բարձրացնել վերջինիս վարկանիշը։ Բազմաթիվ աշխատանքներ, որոնք չէին համապատասխանում նշված պահանջներին, մերժվել էին։ Միաժամանակ հաշվի էր առնվել նաև այն փաստը, որ մասնակիցների մեծ մասը երիտասարդ է և չունի գիտական աշխատանքներ ներկայացնելու փորձ։ Ուստի նրանց հետ անց է կացվել հսկայական աշխատանք. մատնանշվել են վրիպումներն ու բացթողումները, և հնարավորություն է տրվել դրանք շտկելու։ Արդյունքում կարող ենք հավաստել, որ գիտաժողովում ներկայացված բոլոր նյութերն, առանց բացառության, ունեին գիտական պատշաճ մակարդակ և համապատասխանում էին միջազգային պահանջներին։

Հուսով ենք, որ արդեն կայացած գիտաժողովը է’լ ավելի բարձր արդյունքներ կգրանցի հաջորդ` V գիտաժողովին, որը տեղի կունենա 2009 թ:

Հեղինակ. Վահե Տեր-Մինասյան

Սկզբնաղբյուր. Ֆարմացևտ պրակտիկ 10-2007

2004-2022 © Հայկական բժշկական ասոցիացիա